Gustaríame con esta nova entrada en “stellae” expresar a forma de ver o asesoramento no centro de discapacitados nos que estou realizando as miñas prácticas (unhas prácticas que son diferentes da dos meus compañeiros de carreira, estas son prácticas feitas a través do  consello social e obtés por elas a cantidade de créditos correspondente ás horas que se realizan) por se algún compañeiro non ten a oportunidade de achegarse a un centro deste estilo.

A asociación AMICOS é unha Asociación de Familias de Persoas con Discapacidade Intelectual sen ánimo de lucro dedicada a mellorar a calidade de vida das persoas con discapacidade intelectual e das súas familias, mediante unha atención personalizada de calidade contrastada.

O seu obxectivo principal é dar unha atención individualizada e personalizada tendo en conta a idiosincrasia das persoas con discapacidade, así como as súas necesidades e inquietudes, favorecendo con elo o desenvolvemento emocional, psicolóxico e social.

Amicos nace a partires dun grupo de pais e nais que, sensibilizados polas trabas que sofren os seus fillos, queren poñerlle  fin ás mesmas ofrecéndolles unha iniciativa que pretende suplir as carencias da zona.

Dende o primeiro momento a asociación AMICOS ten como obxectivos fundacionais a atención e rehabilitación das persoas con discapacidade intelectual das comarcas do Barbanza e Noia, e de maneira especial as persoas dependentes gravemente afectadas.

Con respecto ás persoas que representan maiores capacidades e que participan nos obradoiros, potenciase principalmente a adquisición de habilidades e hábitos de traballo que posibiliten a súa integración sociolaboral, non por  iso, se esquecen as demais áreas esenciais para lograr unha mellora da autonomía, autoestima e integración social.

As actividades que se realizan ao longo do ano son, a grandes rasgos:

-          Atención a persoas con discapacidade

• Centro de día
  • Servizo de Apoio Personalizado (U.A.P.): Actividades da vida diaria, Psicomotricidade, Estimulación Cognitiva, etc.
  • Unidade de Atención Asistencial: Obradoiros adaptados, Terapia ocupacional
• Centro Ocupacional
  • Área de control sanitario
  • Área de obradoiros adaptados
  • Terapia Ocupacional
• Centro de Educación Especial (para nenos de entre os 3 e os 21 anos)
• Actividades de Reforzo
  • Actividades estivais
  • Actividades de reforzo continuado
• Programa de envellecemento

-          Formación

• Formación ocupacional
  • Curso de Agricultura Ecolóxica
  • Curso de Manipulación de Alimentos
  • Curso de informática
  • Curso de Impresor de pequeno formato
  • Curso de Viveirista
• Formación Interna

-          Servizo de Rehabilitación

• Fisioterapia
• Hidroterapia
• Equitación terapéutica e hipoterapia
• Actividades deportivas

-          Servizo de Transporte Adaptado

-          Servizo de Emprego

• Obradoiro de envasado, de catering, de serigrafía, plastificación

-          Servizo de Deporte e Ocio adaptado

-          ÁREA DE ATENCIÓN E APOIO A FAMILIAS

Esta é a parte da explicación que máis  importancia ten xa que é a que se refire a asesoramento por parte deste centro.

Principalmente dirixen o asesoramento aos alumnos e aos pais e teñen uns determinados servizos a todos eles:

• Servizo de apoio domiciliario e asistencia persoal: melloran os recursos das familias para que se poidan afrontar a situacións difíciles para eles. Céntrase en axudas a domicilio, acompañamento a servizos médicos e acompañamento a valoracións de dependencia
• Servizo de apoio e atención psicolóxica: para liberar as tensións e o estrés que poidan sufrir as familias con risoterapia e musicoterapia.
• Servizo de asesoría xurídica: para asesorar e orientar sobre aspectos legais e resolver dúbidas referentes a procedementos legais
• Servizo de respiro familiar: realiza accións de información, formación, apoio e alivio ás familias que favorecen a creación de condicións e actitudes positivas no entorno familiar

Tamén podemos falar dun “asesoramento externo” co obxectivo de concienciar e motivar á poboación máis nova a introducirse no mundo da discapacidade, a coñecer as súas necesidades, inquedanzas, os seus problemas de integración, laborais, etc. Para isto creouse o proxecto “INTEGR@ESCOLA”,  cas seguintes actividades:

1. Área de Exposición de traballes realizados por persoas con discapacidade
2. Obradoiros – Obradoiro de Integración: para poñerse na pel dun discapacitado
3. Área de Exposición de Avances Tecnolóxicos e Apoios Básicos de persoas con discapacidade

A modo de conclusión teño que recoñecer o gran traballo que se realiza cos discapacitados e cas súas familias á hora de achegalos á sociedade e a que sexan capaces de realizar actividades da vida diaria e a unha formación que non poderían levar a cabo noutro centro que se especializara tanto coma este.

O que si que non puiden observar é un asesoramento por parte dos propios profesionais do centro. Parece como se non houbera un trato que conlevara a un achegamento, a unha orientación entre eles, máis ben parece como se houbera un individualismo e cada un se ocupara das súas cousas e non tivera que ver cos demais. É certo que todos se coñecen e todos coidan de todos os alumnos e que está presente o posto de psicopedagogo (aínda que a día de hoxe descoñezo quen é), mais parece que esa relación que poida haber nun centro entre profesores cas súas correspondentes reunións dirixidas a través dun orientador, non se cumpren. É por iso que me responsabilizo de investigar isto e averiguar se todo o que levamos traballando nesta asignatura me poida servir nestas prácticas e poida utilizar algo do aprendido.