Denébola Álvarez-Seoane, Jesús Rodríguez Rodríguez, Ana Rodríguez Guimeráns e Pablo Gayo-Pérez, integrantes do Grupo de Investigación Stellae, participaron na XVIII Conferencia Internacional de IARTEM (The International Association for Research on Textbooks and Educational Media), celebrada na Universidade de Opole (Polonia) do 22 ao 25 de setembro de 2026. O encontro reuniu investigacións sobre libros de texto e outros materiais educativos, con especial atención á diversidade, aos recursos dixitais e á súa relación coas prácticas de ensino. A primeira xornada estivo dedicada ao PhD Day, un espazo específico para investigadoras e investigadores en formación.
A participación de Stellae concretouse en cinco comunicacións. O mércores 23, Denébola Álvarez-Seoane presentou Textbook Regulation, Production, Selection and Use across Spanish-speaking Countries: A Comparative Analysis. A investigación compara como se producen, regulan, seleccionan e financian os libros de texto en distintos sistemas educativos, así como o que se coñece sobre o seu uso nas aulas. A análise amosa diversas combinacións de intervención pública, actividade editorial e autonomía dos centros e do profesorado. Tamén aborda a convivencia dos materiais impresos e dixitais e os debates emerxentes sobre intelixencia artificial. Ese mesmo día, Ana Rodríguez Guimeráns presentou, xunto con Clara Martínez Delgado e María Montserrat Castro Rodríguez, Diversity in Children’s Storybooks: A Discourse Analysis of Diversity in Contemporary Children’s Literature. O traballo analiza cinco contos infantís recomendados para abordar a inclusión en Educación Infantil e estuda como os seus textos e imaxes representan a diversidade. Os resultados amosan que as mensaxes de empatía e respecto poden coexistir con enfoques paternalistas ou con relatos que presentan a diferenza como unha carencia. A comunicación convida así a examinar criticamente os contos que se seleccionan como recursos educativos.
O xoves 24, Ana Rodríguez Guimeráns, Jesús Rodríguez Rodríguez e Pablo Gayo-Pérez participaron, xunto con Sebastián Martín-Gómez, en Digital Teaching Materials in Compulsory Secondary Education in Spain: Main Findings from the secundari@ digit@l Project. A comunicación deu a coñecer os principais resultados do proxecto Secundari@ Digit@l, centrado nos materiais didácticos dixitais para a Educación Secundaria Obrigatoria. A investigación estuda as características das plataformas e dos recursos, recolle as perspectivas do profesorado, do alumnado, das familias e das editoriais, e examina como se utilizan estes materiais nos centros educativos. Para iso combina a análise de recursos dixitais, entrevistas e estudos de caso.

Tamén o xoves, Denébola Álvarez-Seoane, Pablo Gayo-Pérez e Ana Rodríguez Guimeráns presentaron GeoGebra as a Pedagogical and Authoring Tool in Secondary Mathematics Education: A Case Study of Digital Practices. A partir da observación de clases de matemáticas de secundaria, o estudo analiza o uso de GeoGebra para visualizar e manipular conceptos matemáticos e para crear actividades de aprendizaxe. A investigación amosa que a ferramenta pode favorecer a exploración matemática cando o profesorado deseña as actividades e guía o traballo na aula. Tamén sinala que ese potencial se reduce se as tarefas levan o alumnado a reproducir procedementos sen explorar por si mesmo as relacións matemáticas.

A quinta comunicación presentouse o venres 25. En Local Themes and Community Orientation in Municipal Teaching Materials: Integrating Local Knowledge, Traditions, and Narratives in A Coruña (Spain), Denébola Álvarez-Seoane examinou materiais didácticos elaborados co apoio de concellos da provincia da Coruña. O estudo identifica a presenza do patrimonio, da memoria, do medio ambiente e doutras cuestións vinculadas ao territorio. Moitos destes recursos diríxense á poboación xeral e cumpren funcións de información e divulgación, ademais de poder utilizarse en contextos escolares. O traballo propón así mesmo reforzar os vínculos entre as iniciativas municipais, os centros educativos e outros axentes comunitarios.

En Opole, Stellae compartiu resultados de proxectos colectivos e de estudos centrados en contextos moi diferentes: desde o estudo comparado dos libros de texto ata a representación da diversidade, o uso de materiais dixitais en secundaria e a produción de recursos educativos vinculados ao territorio. As cinco comunicacións permiten poñer en diálogo parte da investigación realizada polo grupo durante este ano coa comunidade internacional dedicada ao estudo dos materiais educativos.


